पिंपरी : पिंपरी-चिंचवड महापालिकेच्या स्थायी समितीने आज शहराच्या विकासाला ‘बुस्टर डोस’ दिला आहे. स्थायी समिती सभापती अभिषेक बारणे यांच्या अध्यक्षतेखाली पार पडलेल्या बैठकीत महापालिकेचे उत्पन्न वाढवणे, आरोग्य सुविधा हायटेक करणे आणि ई-वाहनांना प्रोत्साहन देण्यासह तब्बल २४ हून अधिक महत्त्वाच्या विषयांना हिरवा कंदील दाखवण्यात आला आहे.
पब्लिक वाईसच्या वाचकांसाठी या बैठकीतील सर्वात महत्त्वाचे आणि थेट नागरिकांच्या फायद्याचे निर्णय खालीलप्रमाणे:
महापालिकेची तिजोरी भरणार:
- उड्डाणपूल आणि खांबांवर जाहिराती: शहरातील ८० उड्डाणपूल, भुयारी मार्ग आणि तब्बल १५ हजारांहून अधिक इलेक्ट्रिक पोलवर (कियोस्क) जाहिरातींचे हक्क ई-लिलावाद्वारे दिले जाणार आहेत. जुना पुणे-मुंबई महामार्ग आणि BRT मार्गांवरून महापालिकेला आता तगडा महसूल मिळणार आहे.
रिक्षाचालकांसाठी बंपर ऑफर (ई-वाहन प्रोत्साहन):
- ३० हजारांचे अनुदान: शहरातील प्रदूषण कमी करण्यासाठी जुन्या इंधनावरील रिक्षांचे ई-रिक्षामध्ये (रेट्रोफिटिंग) रूपांतर केल्यास वाहनधारकांना प्रति रिक्षा ₹३०,००० चे अनुदान देण्याची महत्त्वपूर्ण शिफारस करण्यात आली आहे.
आरोग्य सेवा होणार अधिक सक्षम:
- वायसीएम (YCM) रुग्णालय: येथे महात्मा ज्योतिबा फुले जीवनदायी योजना अधिक प्रभावीपणे राबवण्यासाठी आणि मंत्रालयाशी थेट संपर्कासाठी हायस्पीड इंटरनेट (३० Mbps) बसवण्यात येणार आहे. शवागारातील कोल्ड स्टोरेजच्या देखभालीलाही मंजुरी देण्यात आली आहे.
- ३७ नवीन ड्रायव्हर्स: महापालिकेच्या वायसीएम, भोसरी, सांगवी, आकुर्डीसह इतर रुग्णालयांसाठी कंत्राटी पद्धतीने ३७ वाहनचालक उपलब्ध करून दिले जाणार आहेत.
रस्ते आणि पायाभूत सुविधा:
- चिंचवडची वाहतूक कोंडी फुटणार: प्रभाग क्र. १८ (चिंचवड) मधील ‘मिसिंग लिंक’ आणि इतर रस्ते विकसित करण्यासाठी प्रकल्प सल्लागाराची नियुक्ती.
- पावसाळी गटारे: संभाजीनगर (प्रभाग १०) मध्ये स्टॉर्म वॉटर लाईन उभारणार, जेणेकरून पावसाचे पाणी तुंबणार नाही.
- BRT दुरुस्ती: बीआरटी मार्गावरील रेलिंग आणि बसस्टॉपची दुरुस्ती केली जाणार.
नागरिक कल्याण आणि सामाजिक भान:
- मोफत पीएमपीएमएल (PMPML) पास: एचआयव्ही/एड्स बाधित पात्र रुग्णांना मोफत बस पास देण्यासाठी निधी मंजूर.
- दापोडीत नवीन तलाठी कार्यालय: दापोडीकरांची गैरसोय टाळण्यासाठी स्वतंत्र तलाठी कार्यालयासाठी महापालिका आपली जागा भाडेतत्त्वावर देणार आहे.
- उर्दू शाळा: महापालिकेच्या उर्दू माध्यम बालवाडीतील विद्यार्थ्यांसाठी लेखन साहित्य खरेदीला मंजुरी.
सभापतींची प्रतिक्रिया:
“महापालिकेच्या आर्थिक उत्पन्नात वाढ आणि नागरिकांना दर्जेदार सुविधा या दुहेरी उद्देशाने आज निर्णय घेतले आहेत. पायाभूत सुविधा, आरोग्य, पर्यावरण संरक्षण आणि अग्निसुरक्षा अधिक सक्षम करण्यावर आमचा भर राहील. शहराचा सर्वांगीण विकास करण्यासाठी आम्ही कटिबद्ध आहोत.”
– अभिषेक बारणे, स्थायी समिती सभापती, पिंपरी चिंचवड महापालिका.
