राजश्री आतकरे पवार (8668371826)
पुणे: “स्वच्छ पुणे, सुंदर पुणे” हे केवळ घोषवाक्य नसून ते ध्येय मानून एका जिद्दी महिला उद्योजिकेने कचरा व्यवस्थापन क्षेत्रात क्रांती घडवली आहे. अमरावती जिल्ह्यातील एका छोट्या गावातून आलेल्या अनुजा सगने यांनी आपल्या कष्टाच्या आणि जिद्दीच्या जोरावर ५० हून अधिक कुटुंबांना रोजगार उपलब्ध करून देत, पुणे आणि पिंपरी-चिंचवडमध्ये स्वतःची वेगळी ओळख निर्माण केली आहे. ‘पुणे व्हॉइस’ सोबत साधलेल्या विशेष संवादामध्ये त्यांनी आपला शून्य ते यशाचा प्रवास उलगडला.
नोकरी ते उद्योजिका: एक धाडसी निर्णय
२०१६ मध्ये एम.एस.डब्ल्यू. (MSW) चे शिक्षण पूर्ण करून अनुजा पुण्यात आल्या. सुरुवातीला केवळ ७ ते १० हजार रुपयांच्या पगारावर त्यांनी एका संस्थेत सुपरवायझर म्हणून काम केले. बाणेर-बालेवाडी भागात काम करताना त्यांना कचरा व्यवस्थापनातील त्रुटी आणि नागरिकांच्या समस्या जवळून पाहता आल्या. “दुसऱ्यासाठी कष्ट करण्यापेक्षा स्वतःचे अस्तित्व का निर्माण करू नये?” या एका विचाराने त्यांच्या आयुष्याला कलाटणी दिली.
शून्यातून विश्व निर्माण
कोणतीही मोठी कौटुंबिक पार्श्वभूमी नसताना अनुजा यांनी व्यवसायात उडी घेतली. त्यांचे सासरे आणि पती यांनी खंबीर साथ देत पहिले एक लाख रुपये भांडवल उभे केले. एका गाडीपासून सुरू झालेला हा प्रवास आज पाच गाड्यांपर्यंत पोहोचला आहे. आज त्या बाणेर-बालेवाडी भागातील ७० ते ८० सोसायट्यांचा कचरा उचलण्याचे आणि त्यावर प्रक्रिया करण्याचे काम यशस्वीपणे करत आहेत.
संकटातही माणुसकीची साथ
कोरोनाच्या भीषण काळात जेव्हा संपूर्ण जग थांबले होते, तेव्हा अनुजा आणि त्यांची टीम जिवाची पर्वा न करता रस्त्यावर होती. क्वारंटाईन असलेल्या घरांचा कचरा उचलण्यापासून ते सोसायट्या निर्जंतुक करण्यापर्यंत त्यांनी मोलाचे काम केले. त्यांच्या एका कामगाराला कोरोना झाल्यावर घरमालकाने बाहेर काढले होते, अशा वेळी अनुजा यांनी स्वतः पुढाकार घेऊन त्या कामगाराच्या उपचारांची आणि राहण्याची जबाबदारी उचलली.
प्रशासकीय आणि राजकीय पाठबळ
या प्रवासात माजी नगरसेवक अमोल बालवडकर आणि अनिल प्रधान यांनी त्यांना तांत्रिक आणि प्रशासकीय पातळीवर मोलाचे सहकार्य केले. तसेच, पिंपरी-चिंचवडमध्ये विष्णू शेठ जगताप यांनी अनुजा यांच्यातील कसब ओळखून त्यांना खत निर्मिती प्रकल्पासाठी स्वतःची जागा आणि शेड उपलब्ध करून दिले.
एकाच वेळी तीन यशस्वी व्यवसाय
अनुजा यांनी केवळ कचरा उचलण्यावरच लक्ष केंद्रित केले नाही, तर त्याचे वर्गीकरण करून त्यातून तीन वेगळे उत्पन्न स्त्रोत निर्माण केले आहेत:
१. कचरा संकलन: सोसायट्यांमधून ओला व सुका कचरा उचलणे.
२. कंपोस्टिंग: ओल्या कचऱ्यापासून खत निर्मिती करणे.
३. हाऊसकीपिंग: सोसायट्यांच्या स्वच्छतेचे व्यवस्थापन पाहणे.
पुणेकरांना आवाहन
”पुणे शहर खऱ्या अर्थाने स्वच्छ व्हायचे असेल, तर नागरिकांनी घरातूनच ओला आणि सुका कचरा वेगळा करून देणे ही काळाची गरज आहे,” असा संदेश त्यांनी पुणेकरांना दिला.
”महिलांनी मनात आणले आणि जिद्द चिकाटी ठेवली, तर त्या कोणत्याही क्षेत्रात यशाचे शिखर गाठू शकतात,” असे मत अनुजा सगने यांनी व्यक्त केले.
तुम्हाला ही प्रेरणादायी मुलाखत कशी वाटली? कमेंट्समध्ये नक्की कळवा आणि अशाच सकारात्मक बातम्यांसाठी ‘ द पब्लिक व्हॉइस’ला फॉलो करा.
