मधुबन मित्र मंडळ ट्रस्टचा प्रशासनाला कडक इशारा; वीज पुरवठा सुरळीत न झाल्यास आंदोलनाचा पवित्रा
सांगवी: पिंपरी-चिंचवडमधील सांगवी परिसरात गेल्या काही दिवसांपासून विजेचा मोठा खेळखंडोबा सुरू आहे. ऐन उन्हाळ्यात वारंवार वीज खंडित होत असल्याने नागरिक हैराण झाले असून, या अन्यायाविरोधात आता ‘मधुबन मित्र मंडळ ट्रस्ट’ ने आक्रमक पवित्रा घेतला आहे. यासंदर्भात मंडळाचे अध्यक्ष श्री. गणेश निवृत्ती ढोरे यांच्या नेतृत्वाखाली महावितरणच्या कार्यकारी अभियंत्यांना निवेदन देऊन जाब विचारण्यात आला.
पाणीपुरवठाही धोक्यात!
विजेच्या लपंडावामुळे केवळ उकाड्याचाच त्रास होत नसून, याचा थेट परिणाम पाणीपुरवठ्यावर होत आहे. ज्या दिवशी पाणी येते, नेमक्या त्याच वेळी वीज गायब होत असल्याने महिला वर्गाचे प्रचंड हाल होत आहेत. “महावितरणच्या या गलथान कारभारामुळे नागरिकांचे दैनंदिन जीवन विस्कळीत झाले आहे,” अशी संतप्त प्रतिक्रिया स्थानिक नागरिकांनी व्यक्त केली आहे.
लहान मुले आणि ज्येष्ठांचे हाल
सध्या तापमानाचा पारा ४० अंशांच्या पार गेला असताना, तासनतास वीज नसल्यामुळे घरात बसणेही कठीण झाले आहे. लहान मुले, वृद्ध नागरिक आणि वर्क फ्रॉम होम करणाऱ्या कर्मचाऱ्यांना याचा मोठा फटका बसत आहे. वारंवार तक्रार करूनही प्रशासनाकडून केवळ आश्वासने मिळत असल्याने नागरिकांमध्ये तीव्र संताप आहे.
प्रशासनाला शेवटचा इशारा
मधुबन मित्र मंडळ ट्रस्टने निवेदनात स्पष्ट म्हटले आहे की, सांगवी परिसरातील वीज पुरवठा तात्काळ सुरळीत आणि अखंडित करावा. जर प्रशासनाने या समस्येकडे दुर्लक्ष केले, तर सांगवीकर रस्त्यावर उतरून तीव्र आंदोलन करतील, असा इशाराही यावेळी देण्यात आला.
यावेळी मधुबन मित्र मंडळाचे पदाधिकारी आणि सांगवी परिसरातील नागरिक मोठ्या संख्येने उपस्थित होते.
